AI gerir framleiðsluna auðveldari. Ekki hönnunina.

Gervigreind getur búið til myndir, útlit, hugmyndir og hundruð tillagna á örfáum sekúndum. Hún getur flýtt fyrir vinnu og tekið yfir verkefni sem áður voru tímafrek.

En það að geta framleitt eitthvað hratt er ekki það sama og að kunna að hanna.

Hönnun snýst ekki bara um að búa til eitthvað sem lítur vel út. Hún snýst um að skilja vandamálið, fólkið sem á að ná í, samhengið, menninguna, vörumerkið og markmiðin. Hönnuður þarf að vita hvað á að segja, hverju á að sleppa og hvers vegna ákveðin lausn er rétt. Og stundum þarf hann líka að sjá að verkefnalýsingin sjálf er röng.

Viðskiptavinurinn vill ekki alltaf það sem hann þarf. Góður hönnuður leysir því ekki bara verkefnið sem honum er gefið. Hann þarf líka að sjá þegar verið er að spyrja rangrar spurningar eða reyna að leysa rangt vandamál.

Þar skiptir reynslan máli.

Gervigreind hefur ekki setið á fundi þar sem viðskiptavinurinn segir eitt en meinar annað. Hún hefur ekki séð góða hugmynd fara forgörðum vegna þess að hún var útfærð illa. Hún tekur heldur ekki ábyrgð á niðurstöðunni.

Hönnuður þarf aftur á móti að taka afstöðu. Stundum þarf hann að segja nei, útskýra hvers vegna ákveðin lausn virkar ekki og sannfæra viðskiptavin um að fara aðra leið.

Þetta er ekki aukahluti af starfinu. Þetta er stór hluti af því sem góð hönnun byggir á. Og þetta er einmitt sá hluti sem er erfiðast að setja í fyrirmæli til gervigreindar.

AI getur búið til. Hönnuðurinn þarf að velja.

Gervigreind getur framleitt endalaust magn af tillögum. En meira magn þýðir ekki betri hönnun.

Að búa til 200 mögulegar lausnir er eitt. Að sjá hvaða eina lausn er rétt, hafna hinum 199 og geta útskýrt hvers vegna, það er hönnunarvinna.

Vel notuð gervigreind getur þó verið meira en bara framleiðslutæki. Hún getur ögrað fyrstu hugmyndinni, bent á aðrar leiðir og hjálpað hönnuðinum að kanna fleiri möguleika en tími eða fjárhagsrammi hefði annars leyft.

Þá er hönnuðurinn ekki aðeins að velja úr niðurstöðum heldur að stýra ferlinu, móta spurningarnar og færa hugmyndina áfram.

Þegar nánast allir geta búið til eitthvað sem lítur tæknilega fagmannlega út verður erfiðara, ekki auðveldara, að skera sig úr. Betri verkfæri gera slæman hönnuð ekki að góðum hönnuði.

AI hefur þegar breytt vinnuferlinu

Gervigreind snýst ekki bara um að búa til myndir frá grunni. Hún er þegar orðin hluti af mörgum verkfærum sem hönnuðir nota daglega.

Einföld dæmi eru Select Subject og Remove Background í Photoshop. Verk sem áður gátu þýtt langa og leiðinlega vinnu við að maska manneskju, hár eða flókinn hlut frá bakgrunni geta nú tekið nokkrar sekúndur. Það eitt hefur gert starf grafíska hönnuðarins töluvert skemmtilegra.

Ég nota AI líka til að laga og betrumbæta texta, skrifa fyrstu drög, prófa hugmyndir, stækka myndir í lágri upplausn, hreinsa upp myndefni, búa til scriptur fyrir Illustrator og InDesign og leysa ýmis tæknileg verkefni sem áður tóku mun meiri tíma.

Þetta þýðir ekki að AI geri hönnunarvinnuna fyrir mig. Það þýðir að minni tími fer í endurtekna og leiðinlega tæknivinnu og meiri tími í það sem ég vil í raun eyða tímanum í: hugmyndina, hönnunina og útfærsluna.

Þessi tímasparnaður skilar sér líka til viðskiptavinarins. Verkefni geta gengið hraðar, fleiri möguleikar verið prófaðir og meiri hluti tímans farið í vinnu sem raunverulega bætir niðurstöðuna.

Stundum er besta notkunin á AI ekki að láta það skapa eitthvað fyrir mann, heldur einfaldlega að losna við vinnu sem enginn saknar.

Þegar budgetið nær ekki alla leið

Budget, tími og framleiðslutakmarkanir hafa alltaf áhrif á hönnun. Stundum þýðir það einfaldlega að góð hugmynd er ekki framkvæmanleg með hefðbundnum hætti. Þar getur AI skipt miklu máli.

Umræðan um AI verður stundum of einföld. Það er oft talað eins og hvert einasta AI-myndverk sé verkefni sem hafi verið tekið frá ljósmyndara, teiknara eða öðrum skapandi fagmanni. Það er ekki alltaf þannig.

Ég hef sjálfur notað gervigreind þar sem valkosturinn hefði ekki verið að ráða fagmann, heldur einfaldlega að sleppa hugmyndinni.

Ég tók ljósmyndirnar sjálfur, bjó geimskipin til með AI og setti síðan allt saman í Photoshop.

Gott dæmi eru bækurnar UFO 101 og UFO 202 sem ég hannaði. Budgetið í slíkum bókaverkefnum er takmarkað og það var ekki mögulegt að ráða teiknara, ljósmyndara eða annað sérhæft fagfólk til að búa til sérsniðið myndefni fyrir allar þær hugmyndir sem þurfti að myndgera.

Með AI gat ég hins vegar búið til myndefni sérstaklega fyrir efnið, prófað ólíkar hugmyndir og byggt upp myndheim sem hefði annars ekki verið mögulegur innan fjárhagsrammans.

Hönnunarvinnan hvarf samt ekki. Það þurfti enn að ákveða hvað ætti að sýna, finna rétta sjónarhornið, stýra útliti myndanna, velja úr niðurstöðum, vinna þær áfram og láta þær passa inn í heildina.

AI gerði verkefnið mögulegt. Það hannaði ekki bókina.

Hvenær er AI rétt lausn?

Ef lítið verkefni, einyrki eða lítið fyrirtæki getur með AI búið til kynningarefni sem annars hefði aldrei orðið til, þá finnst mér það jákvæð þróun. Tæknin gefur fólki aðgang að verkfærum sem það hafði einfaldlega ekki áður.

En þegar stórt fyrirtæki með raunverulegt markaðsbudget notar gervigreind eingöngu til að komast hjá því að ráða skapandi fagfólk, þá er málið annað.

Spurningin ætti ekki að vera hvort AI sé ódýrara eða hraðara, heldur hvort það sé besta lausnin fyrir verkefnið.

Ef hugmyndin kallar á frábæran teiknara, ljósmyndara eða annað sérhæft fagfólk og budgetið er til staðar, þá er engin ástæða til að velja AI sjálfkrafa.

AI er best þegar það opnar möguleika, ekki þegar það er bara ódýrasti staðgengillinn.

Verðmætið færist

Gervigreind mun án efa breyta starfi hönnuða. Sum verkefni hverfa, önnur verða hraðari og tæknileg framkvæmd verður auðveldari og ódýrari.

Þegar það gerist færist verðmætið frá framkvæmdinni sjálfri yfir í hugmyndina, dómgreindina, smekkinn og hæfileikann til að sjá heildarmyndina.

Þess vegna held ég að áhugaverðasta spurningin sé ekki hvort AI muni leysa hönnuði af hólmi, heldur hvað verður verðmætt þegar nánast allir geta búið til myndir, lógó, uppsetningar og auglýsingar.

Svarið er líklega það sama og hefur alltaf skilið góða hönnun frá þeirri slæmu:

Hugmyndin. Smekkurinn. Dómgreindin.